ஏமாற்றத்தின் சுழற்சி எழுதப்படாத விதி

 ஏமாற்றத்தின் சுழற்சி எழுதப்படாத விதி வாழ்வியல் சிந்திக்க வேண்டிய கட்டுரை 

ஏமாற்றத்தின் சுழற்சி

மனித வாழ்க்கையின் எழுதப்படாத விதி

1. இரக்கத்தை தொழிலாக மாற்றியவன்

உழைக்க மனம் இல்லாதவன் யாசிக்கும் காட்சி

பேருந்து நிலையங்களில் சில மனிதர்களை நாம் தினமும் பார்க்கிறோம்.

“ஐயா… யாரோ பர்ஸை எடுத்துட்டாங்க… ஊருக்கு போக ஒரு ஐம்பது ரூபாய் உதவி பண்ணுங்க…” என்று கெஞ்சிக் கொண்டிருப்பார்கள். அவர்களின் முகத்தில் இருக்கும் அவசரத்தையும் குரலில் இருக்கும் சோகத்தையும் பார்த்து சிலர் இரக்கப்பட்டு பணம் கொடுத்து விடுகிறார்கள். உதவி செய்துவிட்டோம் என்று மனநிறைவுடன் சென்று விடும் அந்த மனிதர்களுக்குத் தெரியாது — அது சில நேரங்களில் பசியின் நடிப்பு, வாழ்க்கைக்காக கற்றுக்கொண்ட ஏமாற்றம் என்பதைக்.

மேலும் படிக்க:தங்கதமிழன் கவிதைகள்

2. உழைப்பவரிடம் மட்டும் பேரம்

அதே மனிதர்கள் கொஞ்ச நேரம் கழித்து சந்தைக்கு செல்கிறார்கள். அங்கே கீரை விற்கும் பாட்டியையோ பூ விற்கும் பெண்ணையோ பார்த்தவுடன், “என்னம்மா இவ்வளவு விலை சொல்றே?” என்று பேரம் பேச ஆரம்பித்துவிடுகிறார்கள். “இதுல எங்களுக்கு ஒரு ரூபாய் லாபம் தான் கிடைக்கும் பா…” என்று அந்த பாட்டி சொல்லியும், இன்னும் இரண்டு ரூபாய் குறைக்காமல் வாங்க மனசு வருவதில்லை. பேருந்து நிலையத்தில் தெரியாத ஒருவனுக்கு இரக்கப்பட்ட மனசு, உழைத்து நிற்கும் பாட்டியிடம் மட்டும் கடினமாகி விடுகிறது.

3. ஏமாந்தவளின் வாழ்க்கைப் போராட்டம்

அந்த பாட்டி காலையிலேயே மொத்த சந்தைக்கு போய் பொருள் வாங்கி வந்திருக்கிறாள். அவளிடமும் யாரோ ஏமாற்றி தான் அதிக விலைக்கு பொருள் தள்ளியிருக்கிறார்கள். “இது நல்ல கீரை… நல்ல பூ…” என்று சொல்லி பழைய பொருளை கொடுத்திருக்கிறார்கள். அவளும் வாழ வேண்டிய கட்டாயத்தில் அதை வாங்கி வந்து தெருவோரத்தில் உட்கார்ந்து விற்கிறாள். அவளை விலை பேசிக் குறைக்கும் மனிதர்களுக்கும் தெரியாது — அவளும் இன்னொருவரிடம் ஏமாந்துதான் இங்கே உட்கார்ந்திருக்கிறாள் என்பதைக்.

4. தள்ளுபடி என்ற பெயரில் வியாபாரம்

அதற்குப் பிறகு அந்த மனிதர்கள் மளிகைக் கடைக்கும் துணிக்கடைக்கும் செல்கிறார்கள். அங்கே “பெரிய ஆஃபர்”, “தள்ளுபடி விலை”, “ஒன்று வாங்கினால் ஒன்று இலவசம்” என்று பல பலகைகள் தொங்கிக் கொண்டிருக்கும். பழைய பொருளை புதிய விலைக்கு உயர்த்தி வைத்து, பின்னர் அதையே பாதி விலைக்கு தருகிறோம் என்று சொல்லி வியாபாரம் நடக்கிறது. வாங்குபவன் தான் லாபம் பார்த்ததாக நினைக்கிறான்; ஆனால் நின்றுபோன பொருளை கடைக்காரன் லாபத்துடன் தள்ளி விடுகிறான்.

மேலும் படிக்க:ஊழல் கட்சிகளின் கூடாரம் ஆகிறதா?தவெக

5. சேர்த்ததை ஒரே இரவில் இழப்பது

இப்படி ஒருத்தரிடம் ஏமாந்தவன், இன்னொருத்தரை ஏமாற்றிக் கொண்டே வாழ்க்கை நகர்கிறது. எல்லோரும் கொஞ்சம் கொஞ்சமாக சேர்த்து வைத்துக் கொண்டிருக்கிறார்கள். “இப்போது வாழ்க்கை செட்டாகிவிட்டது” என்று நினைக்கும் நேரத்தில், ஒரே இரவில் திருடன் வீட்டுக்குள் நுழைந்து அனைத்தையும் அள்ளிச் செல்கிறான். பல வருடம் சேர்த்த நகையும் பணமும் சில நிமிடங்களில் கைமாறி விடுகிறது.

6. திருடனின் தர்மமும் பக்தியும்

சில நேரங்களில் திருடன் கூட அந்த பணத்தில் ஒரு பகுதியை கோவிலில் காணிக்கையாக செலுத்துகிறான். “கடவுளே காப்பாத்து…” என்று வேண்டிக்கொள்கிறான். அதே நேரத்தில் ஒரு பிச்சைக்காரனுக்கும் ஒரு ரூபாய் போட்டு தர்மம் செய்த உணர்வுடன் சென்று விடுகிறான். ஏமாற்றி சம்பாதித்த பணத்தில்கூட மனிதன் நல்லவன் போல வாழ முயற்சிக்கிறான் என்பது தான் இந்த உலகத்தின் பெரிய விநோதம்.

7. நோயும் ஒரு அமைதியான திருடன்

சிலருக்கு திருடன் தேவையில்லை. வாழ்க்கை முழுக்க சேர்த்த பணத்தை ஒரு நோய் வந்து மருத்துவமனை வாசலில் காலி செய்து விடுகிறது. ஆண்டுகளாக சேமித்த சொத்துகள் சில மாத சிகிச்சைக்குள் கரைந்து போகின்றன. அங்கேயும் மனிதன் காசை இழக்கிறான்; இங்கேயும் மனிதன் காசை பிடிக்க முயற்சிக்கிறான்.

8. உலகத்தின் எழுதப்படாத விதி

கடைசியில் பார்த்தால், இந்த உலகத்தில் காசு மட்டும் சுற்றவில்லை — ஏமாற்றமும் சுற்றிக்கொண்டே இருக்கிறது. ஒருவன் ஏமாற்றி வாழ்கிறான்; இன்னொருவன் ஏமாந்து வாழ்கிறான். இன்று ஏமாற்றுபவன், நாளை ஏமாறுகிறான். இந்த உலகம் முழுவதும் இப்படியே ஒருவரின் கையில் இருந்தது இன்னொருவரின் கைக்கு போகும் முடிவில்லா சுழற்சியாக ஓடிக்கொண்டிருக்கிறது.